Mbahet këtë të mërkurë (18 dhjetor) në Bruksel, samiti i radhës BE–Ballkani Perëndimor, në fokus të të cilit është forcimi i partneritetit mes vendeve përmes integrimit gradual të rajonit në disa prej politikave ndërkombëtare.

Ky është samiti i parë i thirrur nga presidenti i Këshillit Evropian, Antonio Costa, i cili vetëm tre ditë pas marrjes së mandatit shtroi një darkë informale për liderët e Ballkanit Perëndimor.

Po ashtu, një ditë më parë Shqipëria hapi grupkapitullin VI të negociatave për anëtarësimin në Bashkimin Evropian, një zhvillim ky i vlerësuar edhe nga ndërkombëtarët.

Ndërkohë sa i përket samitit të sotëm në Bruksel, ai do të ndahet në dy sesione dhe rëndësi do i kushtohet bashkëpunimit politik dhe ekonomik mes BE-së dhe Ballkanit Perëndimor.

Plani i rritjes për rajonin, thellimi i angazhimeve politike të BE-së me Ballkanin Perëndimor në fushën e politikës së përbashkët dhe të sigurisë, bashkëpunimi rajonal, fqinjësia e mirë, lufta në Ukrainë dhe ndikimi hibrid i Rusisë në vendet e rajonit do të jenë disa nga temat të cilat do të trajtohen në samit.

/rtsh.al/