Nisma “Ballkani i Hapur” mund të jetë një ide e mirë për bashkëpunim mes shteteve të Ballkanit Perëndimor, por jo edhe alternativë për Bashkimin Evropian”. Kështu është shprehur Presidenti i Maqedonisë së Veriut, Stevo Pendarovski.

“Që në vitin 2019 kam pasur rezerva lidhur me këtë nismë dhe i kam thënë se cilat janë ato, të mos jetë si alternativë e Bashkimit Evropian e kështu me radhë… Unë nuk kam problem me këtë nismë dhe këtë ua kam thënë edhe iniciatorëve të saj, pasi e shoh se nuk ka komponentë politike, apo në thelb nuk është alternativë për integrimet evropiane”, tha ai.

Pendarovski mbështet “Procesin e Berlinit” pasi sipas tij është qëndrim edhe i Bashkimit Evropian edhe i Komisionit Evropian. Ai shprehet se Ballkani i Hapur’ duhet të jetë pjesë e ‘Procesit të Berlinit’, i cili duhet të shërbejë si ombrellë apo nismë për rajonin drejt integrimit evropian

“Procesi i Berlinit’ është më i mirë sesa ‘Ballkani i Hapur’. Këtë e kanë vlerësuar edhe pjesa më e madhe e shteteve evropiane. Është qëndrim edhe i Bashkimit Evropian edhe i Komisionit Evropian. ‘Ballkani i Hapur’ duhet të jetë pjesë e ‘Procesit të Berlinit’, i cili duhet të shërbejë si ombrellë apo nismë për rajonin drejt integrimit evropian, Tani për tani, qëndrimi i KE-së është se të gjithë duhet të jenë në ‘Procesin e Berlinit’ dhe që të gjashtë shtetet e Ballkanit janë në këtë nismë, ndërsa tri janë pjesë e ‘Ballkanit të Hapur’”, ka deklaruar Pendarovski.

Mali i zi do të marrë pjesë në takimet e radhës të iniciatorëve të “Ballkanit të Hapur” në cilësinë e shtetit vëzhgues, por që pretendon që bëhet vend anëtar.

Takimi i radhës i nismës “Ballkani i Hapur” do të mbahet në Ohër, më 7 dhe 8 qershor.

/rtsh.al/