Ura që lidh rrugën hyrëse të fshatit Boboshticë pësoi dëmtime si pasojë e gërryerjeve nga uji i përroit. Për të shmangur dëmtimin e mëtejshëm të saj si dhe për të ofruar siguri maksimale për kalimin e automjeteve përgjatë saj, bashkia e Korçës nisi menjëherë ndërhyrjen.

Puna konsiston në zëvendësimin e gurëve të rënë në këmbët e urës si dhe në ndërtimin e një muri mbrojtës me beton në lartësinë 1 m e cila do të sigurojë këmbët e kësaj ure. Punimet parashikohet të zgjasin disa ditë. Kjo urë me qemer i përket shek. XIX.

Rehabilitimi i kësaj ure do të lehtësojë lëvizjen për rreth 450 banorë të këtij fshati por edhe për vizitorët që ndalen për të vizituar këtë turistik dhe e zgjedhin prej terrenit të pasur, bimësisë së larmishme, ajrit të pastër, elementë këto që i falin pushuesve një oazë të vërtetë qetësie larg zhurmës së qyteteve por dhe kuzhinës tradicionale.

/RTSH/