Në Katar, Polonia kaloi fazën e grupeve të një Botërori pas 36 vitesh, duke eliminuar Meksikën falë gol diferencës më të mirë për t’u dorëzuar më pas para fuqisë së tepruar të Francës në 16-she. Ekspedita u karakterizua edhe nga golat e parë të Robert Lewandowskit në një Botëror, i cili pasi humbi një penallti kundër Meksikës në ndeshjen e parë shënoi kundër Arabisë Saudite dhe më pas me penallti kundër Francës.

Me pak fjalë, objektivi minimal është arritur, por kthimi i ekipit në shtëpi u shoqërua me mjaft polemika, pjesërisht për shkak të kritikave të trajnerit Czeslaw Michniewicz, i akuzuar për mbrojtje të tepruar nga shtypi dhe gjithashtu nga një pjesë e grupit, duke filluar nga Piotr Zielinski, por edhe rasti që lindi rreth premios së kualifikimit të premtuar, por më pas jo të dhënë nga Qeveria.

Sipas portalit ‘WP SportoweFakty’, kryeministri Mateusz Morawiecki kishte përcaktuar një shifër prej 6.4 milionë eurosh, për t’u ndarë mes lojtarëve dhe stafit teknik dhe polemikat e para u ngritën pikërisht në lidhje me nënndarjen, pasi stafi i Michnieëicz pretendonte 20% krahasuar me 10. % që ishte rënë dakord më parë. Asnjë marrëveshje as për ndarjen mes lojtarëve: Leëandoëski dhe drejtuesit e tjerë të dhomës së zhveshjes mbështetën një shpërndarje në pjesë të barabarta, të tjerët do të kishin preferuar një llogaritje të bazuar në minutat e luajtura. Në furtunë ka hyrë edhe pakënaqësia e Federatës, presidentit të së cilës Cezary Kulesza nuk i pëlqeu ndërhyrja e qeverisë. Në fund duket se shuma do të disbursohet, por nuk do të përfundojë në xhepat e lojtarëve, por në arkën federale dhe do të investohet në infrastrukturë.

Tabloja ndërlikohet nga polemikat që lidhen me inflacionin e lartë që po gjunjëzon vendin, ekonomia e të cilit kushtëzohet fatalisht nga efektet e luftës në Ukrainën fqinje. Në përpjekje për të mbyllur çështjen, vetë Lewandowski u takua me kryeministrin në emër të shokëve të tij të kombëtares dhe më pas e trajtoi çështjen në mënyrë të ashpër: “Kam dëgjuar shumë lajme të sajuara, kështu që dua të sqaroj se nuk ka pasur asnjë mosmarrëveshje mes skuadrës dhe stafit teknik – tha qendërsulmuesi i Barcelonës për portalin ‘Onet.pl’ – Nuk prisnim asgjë, nuk kërkuam kurrë asgjë dhe sigurisht që nuk ishim duke kërkuar  para. Gjithmonë është folur për para virtuale, asnjëherë nuk e kemi marrë shumë seriozisht atë që na kanë thënë.Dua të sqaroj se nuk shkojmë në kombëtare dhe aq më pak në Botëror për para. Për ne, veshja e fanellës së Polonisë është krenari”.