Spanjë – Portugali. Kjo do të jetë finalja e Kampionatit të 2-të Europian të femrave në futboll të sallës, i cili është duke u luajtur në Portugali dhe që po vjen drejtpërsëdrejti në rrjetin e Radio Televizionit. Spanja, si kampione e Europës në fuqi, ka ardhur si një “tërmet” i vërtetë për Ukrainën, teksa ka fituar 9-0. Majte, Luçi, Irene Kordoba, Peke, Ale de Paz, Sanz, Amelia dhe Samper ishin shënueset e golave për iberiket, të cilat nuk kanë hasur në rezistencën e Ukrainës.

Thuajse një ndeshje pa nivel, ndërsa e tillë duket se ka qenë edhe gjysmëfinalja e dytë, Portugali – Hungari. Luzitanet kanë luajtur tenis me Hungarinë, ndërsa në fund kanë fituar 6-0. Pisko, Pedreira, Fifo, Katia Morgado dhe Lopez Pereira ishin shënueset e golave për vendëset, ndërsa e kanë detyruar Hungarinë të shënojë dhe në portën e vet me Folk. Finalja do të luhet të dielën në ora 19:00 dhe do të vijë drejtpërsëdrejti në rrjetin e Radio Televizionit Shqiptar.