25 ditë larg nga zgjedhjet parlamentare të 11 majit, Komisionet Zonale të Administrimit të Zgjedhjeve vazhdojnë me intensitet punën, në mënyrë që çdo gjë që lidhet me infrastrukturën e zgjedhjeve të jetë gati.

Në qytetin e Kavajës gjendet KZAZ nr 43. Kryetari i saj, Tauland Biturku, thotë se puna ka nisur që në muajin shkurt, siç e parashikon Kodi Zgjedhor dhe çdo gjë ka ecur normalisht.

“Jo vetëm për sa i takon verifikimit të qendrave të votimit, por edhe informimit të zgjedhësve në lidhje me vendvotimet që do të kenë në çdo QV. Është realizuar një punë goxha e madhe, edhe në përgatitjen e listave zgjedhore, dhe e kemi rakorduar punën me gjithë drejtuesit e këtyre institucioneve për t’i pasur nën monitorim listat, që të mos dëmtohen,” shprehet z. Biturku.

Risia e këtyre zgjedhjeve janë lehtësirat e krijuara në votim për personat me aftësi të kufizuar.

Në Kavajë janë 20 persona para- dhe tetraplegjikë dhe 92 persona me statusin “i verbër”, për të cilët do të vihet në dispozicion një rampë lëvizëse, ditën e zgjedhjeve.

KZAZ nr. 43, e cila përfshin bashkinë e Kavajës dhe fshatrat përreth saj, përfshin 95 qendra votimi. 

Në total për këtë KZAZ janë regjistruar 62.968 zgjedhës me të drejtë vote.

/rtsh.al/