Të dhënat zyrtare të Institutit të Statistikave (INSTAT) për tremujorin e tretë të vitit 2026 konfirmojnë tendenca të kundërta mes llojeve të ndryshme të transportit në Shqipëri. Ndërsa numri i mjeteve rrugore dhe aktiviteti në portet detare e ajrore ka shënuar rritje, transporti hekurudhor i mallrave ka pësuar një tkurrje të ndjeshme.

Këto përfundime bazohen në burimet administrative të siguruara nga Ministria e Infrastrukturës dhe Energjisë si dhe Drejtoria e Përgjithshme e Doganave.

Transporti rrugor, dominon Tirana, rritet numri i përgjithshëm i mjeteve

Gjatë tremujorit të tretë të vitit 2026, numri total i mjeteve rrugore në qarkullim ka arritur në 1.115.221, duke shënuar një rritje prej 8,7% krahasuar me të njëjtën periudhë të vitit pararendës.

Sipas INSTAT, autoveturat përbëjnë rreth 80,6% të këtij totali. Qarku i Tiranës dominon tregun duke mbajtur peshën më të madhe me 34,7% të mjeteve gjithsej. Megjithë rritjen e numrit të përgjithshëm, regjistrimet e mjeteve të reja kanë shënuar një ulje të lehtë prej 4,8%, ku markat më të preferuara mbeten Volkswagen (16,6%) dhe Mercedes Benz (15,1%).

Transporti hekurudhor, rënie drastike e volumit të mallrave

Në kontrast të thellë me transportin rrugor, ai hekurudhor po kalon një fazë rënieje. Gjatësia e rrjetit në shfrytëzim ka mbetur e pandryshuar në 253 km, ndërsa volumi i transportuar ka pësuar tkurrje.

“Volumi i mallrave të transportuara nëpërmjet rrugëve hekurudhore është 85,9 mijë ton, duke shënuar ulje me 45,0 %, në krahasim me tremujorin e tretë 2025,” thekson raporti.

Pothuajse i gjithë ky transport (98,3%) përbëhet nga lëndë djegëse, përfshirë qymyrin, naftën bruto dhe gazin natyror.

Transporti ajror dhe detar, rritje në pasagjerë dhe ngarkesa

Aktiviteti në hapësirën ajrore dhe portet detare të vendit ka reflektuar rritje gjatë kësaj periudhe tremujore. Në sektorin ajror kanë operuar 35 shoqëri të huaja, ndërkohë që numri i pasagjerëve ka shënuar një rritje prej 23,3% krahasuar me tremujorin e tretë të vitit 2025, duke arritur në afro 4.8 milionë udhëtarë.

Për sa i përket transportit detar, Porti i Durrësit vijon të mbajë peshën kryesore, duke përpunuar 95,8% të volumit të mallrave me det, të cilat u rritën me 9,7%.

“Volumi i mallrave të tregtuara me det (eksport dhe import) është 1.567 mijë ton. Krahasuar me të njëjtën periudhë të vitit 2025, ky tregues është rritur me 6,9 %,” konfirmojnë të dhënat zyrtare nga autoritetet.

Sektori i pasagjerëve detarë u drejtua nga Porti i Sarandës (48,4%) dhe ai i Durrësit (42,6%), duke arritur në totalin e rreth 956 mijë personave që kanë përdorur këtë rrugë udhëtimi.

/rtsh.al/