Tirana ka arritur të sigurojë qëndrimin në “Abissnet Superiore” pas fitores 1-0 të arritur në ndeshjen play-out përballë Pogradecit, luajtur në “Elbasan Arena” dhe që erdhi për shikuesit në ekranin e RTSH 2.

Në pjesën e parë, bardheblutë panë të anulohej një gol, ndërsa pogradecarët krijuan disa mundësi përpara portës së mbrojtur nga Selmani. Në pjesën e dytë, Tirana krijoi më shumë volum loje, por rastet te porta e liqenorëve, të vendosur me forca të shumta në mbrojtje, munguan.

Përpjekjet e bardhebluve u shpërblyen në minutën e 90-të nga një autogol i Hysenllarit. Një goditje me kokë pa shumë pretendime e Jarmouni, është devijuar nga futbollisti i Pogradecit në drejtim të portës duke zhbllokuar sfidën.

Në fundin e takimit nuk munguan dhe momentet e tensionit, Ndreca për bardheblutë dhe Raza për liqenorët u ndëshkuan me karton të kuq.

Është mbyllur me fitoren 1-0 të Tiranës, që siguron qëndrimin në “Abissnet Superiore”, ndërsa Pogradeci duhet të niset edhe njëherë nga Kategoria e Parë.