Aktorë të shoqërisë civile dhe trupës diplomatike në Tiranë kanë bërë thirrje për thjeshtimin e legjislacionit dhe nismave për lëvizjen e lirë e punësimin në rajon. Me sfond “Procesin e njohur të Berlinit”, një analizë e arritjeve praktike të kësaj lirie, rezulton ende me pengesa në rajon për shkak të asaj që studimi e cilëson si shumë rregullim e fragmentim legjislacioni.

“Bashkëpunimi rajonal është gur themeli për zhvillimin ekonomik dhe rrugën drejt BE-së. Angazhimi i qeverisë dhe parlamentit në miratimin e marrëveshjeve është i rëndësishëm. Po ashtu edhe roli i shoqërisë civile në monitorimin dhe lobimin në favor te zbatimit”, tha Zv. ambasadori gjerman.

Ekspertiza shqiptare e legjislacionit shoqërues konstaton po ashtu se disa prej marrëveshjeve të lëvizshmërisë u mungojnë të drejta dhe mekanizma të zbatueshëm, duke e bërë të vështirë për qytetarët të kërkojnë dëmshpërblim kur nuk zbatohen siç duhet.

Në këtë sfond Zv. ambasadorja britanike ka thënë se diskutimet paraprake do të kenë vendin e tyre në përgatitjen e Samitit të radhës të Procesit të Berlinit, që do të mbahet në Mbretërinë e Bashkuar në muajin tetor.

Nga tetë marrëveshje dhe një rekomandim të pajtuara nga vendet anëtare të CEFTA-s në tetor 2024, rezultojnë deri tani vetëm tre të ratifikuara nga të gjitha vendet e Ballkanit Perëndimor.

Gazetare: Entela Komino

/rtsh.al/