Punimet për zgjerimin e superstradës Tiranë-Durrës kanë arritur në masën 50%. Lajmi është bërë me dije nga kryeministri Edi Rama i cili deklaron se puna për zgjerimin e kësaj superstrade po ecën me ritme shumë të mira, ndërsa ka shpërndarë në rrjetin social Facebook edhe pamje nga punimet.

“MIRËMËNGJES dhe nga kantieri i punës për zgjerimin e superstradës Tiranë-Durrës, Faza II, ku punimet kanë ecur me ritme shumë të mira e tashmë realizimi fizik ka arritur në masën 50%, ju uroj një ditë të mbarë”, shkruan Rama.

Autostrada do të zgjerohet me nga 2 korsi, ku njëra do të shërbejë për emergjencat. Kjo ndërhyrje do e kthejë atë nga autostradë e kategorisë “B”, në autostradë të kategorisë “A”.

Ndërhyrjet aktualisht po bëhen përgjatë 6 km të autostradës nga kthesa e Kamzës deri tek mbikalimi i Kasharit.

Me mbarimin e punimeve, limiti i shpejtësisë për makinat që do të përshkojnë këtë segment do të jetë 130 km në orë.

Volumi i trafikut në këtë aks përgjatë muajve të verës varion nga 90 000 deri 120 000 makina në 24 orë.

/rtsh.al/