Në ambientet e Galerisë së Arteve të Shkodrës u çel ekspozita me titullin “T’u ju njit Bunës përpjetë”, që bashkon në një rrugëtim të përbashkët artistik gjashtë piktorë nga qyteti i Ulqinit. Kjo ekspozitë është një nismë e përbashkët e Galerisë së Arteve të Shkodrës, Bashkisë Shkodër dhe platformës “Creative City Ulqin”, me mbështetjen e Agjencisë Kombëtare të Turizmit.

Në hapjen e saj, artistët e penelit sollën për publikun shkodran një koleksion të veçantë veprash që përçojnë identitetin dhe ndjeshmërinë e qytetit bregdetar të Ulqinit.

“Të hapësh këtë ekspozitë në Shkodër duhet të jesh i përgatitur mirë, pasi Shkodra ka dhënë për të gjithë Shqipërinë piktorë të njohur dhe këtu është konkurrenca e fortë”, u shpreh piktori Mehmet Aloja.

“Janë vizatime spontane, të personave me karakter të ndryshëm, që për atë kohë ka qenë një inspirim i rastit”, u shpreh piktori Jozo Koçaj.

Drejtori i Galerisë së Arteve, Fatmir Juka, u shpreh se kjo ekspozitë i shërben forcimit të lidhjeve kulturore dhe promovimit të vlerave të përbashkëta artistike.

“Gjatë përpjekjes për të gjetur një titull u zgjodh Buna si element gjeografik që në rrjedhën e saj është e lundrueshme nga të dyja anët. Meqë artistët në Ulqin kanë ardhur në Shkodër, kështu po i ngjiten Bunës përpjetë”, u shpesh Juka.

Ekspozita me punimet e artistëve Mehmet Aloja, Agron Ujkashi, Jozo Koçaj, Emina Nimanbegu, Ivana Gjonaj dhe Brigita Antoni do të qëndrojë e hapur në Galerinë e Arteve të Shkodrës deri më 13 qershor.

Gazetar: Marjo Gjini

/rtsh.al/