Aletë të shumtë të Presidentit Donald Trump dhe miliarderit Elon Musk janë kapur në mes të një krize në rritje mes dy figurave të profilit të lartë, ndërsa përpjekjet e tyre për të ndërmjetësuar paqen u ndërprenë papritur nga një postim shpërthyes në X.

Tensionet mes dy miliarderëve kanë qenë në rritje gjatë gjithë javës, kryesisht mbi çështjet politike. Musk, i cili së fundmi u largua nga administrata pas një periudhe të kufizuar si punonjës qeveritar, kishte kundërshtuar hapur projektligjin e Trump për agjendën e brendshme që po kalon në Kongres. Por grindja mori një kthesë personale të enjten pasdite.

Akuzat e rënda dhe përshkallëzimi

Përplasja u përshkallëzua kur Trump sugjeroi ndërprerjen e kontratave të biznesit të Musk me qeverinë. Si përgjigje, Musk postoi në X: “Koha për të hedhur bombën vërtet të madhe: @realDonaldTrump është në dosjet e Epstein. Kjo është arsyeja e vërtetë pse ato nuk janë bërë publike. Kalofsh një ditë të mbarë, DJT!”

Këto akuza të rënda, të pa shoqëruara me prova apo detaje se si Musk do të kishte fituar akses në dosjet e Jeffrey Epstein (financierit të turpëruar që vdiq nga vetëvrasja në 2019, ndërsa priste gjyqin për akuza për trafikim seksual), tronditën ata që kanë marrëdhënie të ngushta me të dy palët. Burime pranë Trump dhe Musk e përshkruan këtë si pikën e kthesës, duke u frikësuar se pas akuzave për dosjet Epstein, mund të mos ketë kthim pas.

Trump reagoi shpejt në platformën e tij, Truth Social, duke deklaruar: “Nuk më shqetëson që Eloni të kthehet kundër meje, por duhet ta kishte bërë këtë muaj më parë,” duke u ankuar për sherrin që lind ndërsa administrata e tij kërkon të miratojë projektligjin e saj të politikave.

Menjëherë pas kësaj, Musk bëri thirrje për shkarkimin e Trump, kërcënoi se do të çmontonte anijen kozmike SpaceX Dragon (e cila ktheu astronautët e NASA-s nga Stacioni Ndërkombëtar Hapësinor) dhe parashikoi se tarifat e presidentit do të shkaktonin një recesion më vonë gjatë vitit.

Përpjekjet për Qetësim dhe Hapat e ardhshëm

Aleatët në të dy anët e skandalit kanë qenë në telefon gjatë gjithë ditës së enjte, duke e krahasuar situatën me një “divorc” dhe duke komentuar se e prisnin një përplasje të tillë, por jo kaq shpejt.

Sekretarja e shtypit e Shtëpisë së Bardhë, Karoline Leavitt, i quajti pretendimet e Musk një “episod i pafat” në një deklaratë për CNN.

“Ky është një episod i pafat nga Eloni, i cili është i pakënaqur me Projektligjin One Big Beautiful sepse nuk përfshin politikat që ai donte. Presidenti është i përqendruar në miratimin e këtij legjislacioni historik dhe në bërjen e vendit tonë përsëri të madh,” tha Leavitt.

Në një shenjë qetësimi të vonë të enjten, Musk tërhoqi planet për të çmontuar anijen kozmike Dragon, pasi një përdorues i X e inkurajoi të “qetësohej dhe të bënte një hap prapa”. “Këshillë e mirë,” u përgjigj Musk. “Në rregull, nuk do ta nxjerrim Dragon nga përdorimi.”

Investitori miliarder Bill Ackman gjithashtu ofroi këshilla të ngjashme në X: “Unë mbështes @realDonaldTrump dhe @elonmusk dhe ata duhet të bëjnë paqe për të mirën e vendit tonë të madh. Ne jemi shumë më të fortë së bashku sesa veçmas.” “Nuk ke gabim,” iu përgjigj Musk.

Mbetet për t’u parë nëse një telefonatë midis dy burrave, të cilën disa njerëz pranë tyre shpresojnë ta realizojnë të premten, do të ndodhë dhe do t’i japë fund kësaj grindjeje shpërthyese. CNN

/rtsh.al/