Qendra Kombëtare e Librit dhe Leximit ndau vlerësimet për fituesit e Fondit të Krijimtarisë Letrare për Fëmijë për vitin 2025.

Juria e kryesuar nga Dr. Albert Gjoka, me anëtarë Irena Prici dhe Flori Kasaj, vlerësuan mes 19 dorëshkrimeve këto tri vepra fituese:

1. “Enigma e Kësulës së Kuqe” me autor Ermir Nika
2. “Iliri dhe lepurushi zbulojnë kopshtin zoologjik magjik”, me autore Flogerta Krypi
3. “Dhjetë pyetjet e Ardenit që pritnin përgjigje”, me autore Raimonda Belli Gjençaj

“Çdo vit, Qendra Kombëtare e Librit dhe Leximit mbështet tri vepra të letërsisë shqipe për fëmijë për të pasuruar bibliotekën e librit shqip. Mua më vjen shumë mirë që ky fond, i kthyer tashmë traditë nga Qendra dhe e nisur më herët nga Ministria e Ekonomisë, Kulturës dhe Inovacionit, është kthyer në një mbështetje shumë motivuese për të gjithë autorët e rinj shqiptarë,” tha drejtoresha e Qendrës, Alda Bardhyli.

Kryetari i jurisë, Dr. Albert Gjoka, u shpreh i surprizuar me numrin e aplikimeve.

“Në këtë garë kanë marrë pjesë 19 dorëshkrime dhe është një gjë shumë e bukur kur ke përballë 19 vepra të letërsisë për fëmijë. Besoj që shumica prej tyre mund të jetë një prurje fare e mirë për të gjithë letërsinë bashkëkohore për fëmijë. Është një prurje e madhe për botuesit, por edhe për lexuesit e vegjël,” tha Dr. Gjoka.

Fondi i Krijimtarisë Letrare për Fëmijë çdo vit, u jep mundësinë 3 autorëve të letërsisë për fëmijë të botojnë veprat e tyre..Një vit më parë fitues të këtij fondi ishin autorët Xhevahir Spahiu, Rudina Çupi dhe Rovena Rozhani.

Gazetare: Xhilda Kondi

/rtsh.al/