Një shtetas shqiptar me rrezikshmëri të lartë shoqërore, i kërkuar për vrasje me motive gjakmarrjeje, është kapur dhe arrestuar në Mbretërinë e Bashkuar. Arrestimi i L. L., 48 vjeç, u bë i mundur falë shkëmbimit të informacionit dhe bashkëpunimit të ngushtë ndërmjet Interpol Tiranës dhe Interpol Manchester.

Ky individ ishte shpallur në kërkim ndërkombëtar me qëllim ekstradimi drejt Shqipërisë, në zbatim të një vendimi të vitit 2023 të Gjykatës së Shkallës së Parë Elbasan (dosje e kaluar pranë SPAK). Ndaj tij ishte caktuar masa e sigurisë “Arrest në burg” për veprat penale:

“Vrasje për arsye gjakmarrjeje”

“Sigurimi i mjeteve dhe kushteve për kryerjen e vrasjes”

“Grup i strukturuar kriminal”, në formën e veçantë të bashkëpunimit

“Mbajtja pa leje e armëve dhe municioneve luftarake”

Detaje nga ngjarja

Ngjarja për të cilën akuzohet L. L. ka ndodhur në vitin 2021, në fshatin Gjocaj, Peqin. Aty u vra me armë zjarri shtetasi A. B.

Dyshohet se L. L. ka pasur rolin e organizatorit dhe financuesit të kësaj vrasjeje. Ai gjithashtu dyshohet se ka siguruar mjetet dhe kushtet për kryerjen e saj. Pas ngjarjes, ai dyshohet se ka ndihmuar në transportimin dhe largimin e autorëve nga vendngjarja.

Operacioni ndërkombëtar dhe hapat e ardhshëm

Arrestimi i tij u realizua në kuadër të operacionit ndërkombëtar “The Wanted”, i cili ka në fokus lokalizimin dhe arrestimin e personave në kërkim për vepra të rënda penale.

Veprimet e mëtejshme procedurale për ekstradimin e L. L. drejt Shqipërisë janë aktualisht në proces, në bashkëpunim të ngushtë me autoritetet britanike.

/rtsh.al/