Në mjediset e selisë së Partisë Socialiste ka nisur Akademia Politike, ku do të trajnohen deputetët e zgjedhur të 11 Majit.

54 janë deputetët e rinj, por vetëm 31 prej tyre, që nuk janë ulur më parë në postet e nivelit të ministrave apo zëvendësministrave e kryetarëve të bashkive, do t’i bashkohen tavolinës së kësaj shkolle verore.

Lektorët e kësaj të premteje janë Fatmir Xhafaj, Niko Peleshi dhe Erion Braçe.

“Të gjithë janë shumë të mirë. S’kemi një të preferuar… që nga kryeministri që ishte i pari e deri te i fundit.“

“Ata nuk janë nxënës. Janë kolegët e mi dhe siç ndodh në çdo punë tjetër, dikush që ka një eksperiencë mund t’ia transmetojë kolegëve, në mënyrë metaforike. Është kënaqësi që do të takohem me kolegët e mi, që do të ndaj katër vjet në seancë,” u shpreh z. Xhafaj.

Trajnimi i deputetëve do të jetë intensiv çdo fundjavë deri në fund të muajit korrik. Ka qenë kryeministri Edi Rama që ka çelur punimet e Akademisë ditën e enjte, para festës për 34-vjetorin e krijimit të Partisë Socialiste. Deputetët morën leksionin e tij të parë në ambientet e Qendrës për Hapje dhe Dialog brenda Kryeministrisë.

Gazetare: Jonela Sagajeva

/rtsh.al/