Me ardhjen e verës, janë rritur edhe rastet e zjarreve në rajonin e Sarandës.

Në të katra bashkitë e këtij rajoni janë shënuar disa vatra zjarresh, ku më problematiket janë regjistruar në Ksamil dhe në fshatrat e thellë Grazhdan dhe Malçan. Një vatër mbetet ende aktive.

“Para disa ditësh ishin zhvilluar njëkohësisht dy zjarre: njëri në Çukë, në zonën poshtë Lëkurësit, dhe tjetra në Ksamil, duke vënë në rrezik e duke ndikuar negativisht në kulmin e sezonit turistik,” deklaron nënprefekti i Sarandës, Kristo Kiço.

Kiço thekson rëndësinë e masave parandaluese dhe reagimit të shpejtë në momentin e parë. Ai kërkon nga strukturat e Policisë së Rendit më shumë angazhim, duke shtuar se nuk është normale të ketë kaq shumë zjarre pa u identifikuar autorët.

“Zbatimi i ligjit do të ndikojë drejtpërdrejt në uljen e rasteve të zjarreve,” u shpreh ai. 

Një tjetër zhvillim pozitiv është ngritja e një strukture të re menaxhuese në Krane të Finiqit, që pritet të rrisë kapacitetet në përballimin e emergjencave.

Më herët, situata alarmante e zjarreve dhe përfshirja e të gjitha strukturave shtetërore ishte në qendër të një takimi me drejtuesit e zjarrfikësve dhe bashkive të jugut, në prani edhe të prefektit të Vlorës, Plator Nesturi.

/rtsh.al/