Kryedemokrati Sali Berisha ka komentuar vendimin e sotëm të Gjykatës së Fierit për lirimin me kusht të ish-deputetit demokrat Ervin Salianji.

Sipas Berishës, ish-deputeti u dënua padrejtësisht dhe jashtë çdo rendi kushtetues e ligjor.

Ai akuzoi kryeministrin Edi Rama dhe deputetin Fatmir Xhafaj për burgosjen politike të Salianjit, ndërsa theksoi se duhet të mbajnë përgjegjësi direkte për lënien në qeli prej një periudhe 9-mujore të ish-deputetit.

“9 muaj në burg vetëm e vetëm pse denoncoi Geron Xhafën si trafikant kryesor në qarkun e Vlorës, i cili kërkohej në Milano.

Burgosja e Ervin Salianjit kishte si synim kryesor burgosjen e të vërtetës se Edi Rama, Fatmir Xhafaj dhe Geron Xhafaj udhëhiqnin dhe përfitonin nga trafiqet nga Vlora drejt Italisë.

Natyrisht mbajtja në burg e Ervin Salianjit pa asnjë faj është përgjegjësi direkt personale e Edi Ramës dhe Fatmir Xhafës.

Vendimi i sotëm i gjykatës u shty po me urdhër të Edi Ramës dhe Fatmir Xhafës mbi 6 javë në një akt të turpshëm dhe hakmarrës pa fund”, u shpreh Berisha.

Ish-deputeti demokrat Ervin Salianji fitoi sot lirinë me kusht pas 9 muajsh vuajtje dënimi në burgun e Fierit.

Vendimi u mor sot nga Gjykata e Fierit, pas qëndrimit pozitiv të prokurorit Genc Mane në lidhje me kërkesën e dorëzuar nga Salianji për lirinë me kusht dhe raportit pozitiv të shërbimit të provës.

/rtsh.al/