Shfaqja e murtajës tek ruminatët në disa qytete të vendit është kthyer në një problem serioz për sektorin blegtorisë. Megjithatë, në Qarkun e Kukësit deri më tani nuk është regjistruar asnjë rast i konfirmuar apo i dyshua, këtë e bën të ditur Inspektori veterinar Halim Gjana.

“Qarku i Kukësit që në rastin e parë në Shkodër, ka qenë shërbimi veterinar i angazhuar në terren. Deri më tani qarku i Kukësit nuk ka asnjë rast të dyshimtë”, u shpreh ai.

Gjana thotë se janë ngritur grupet e punës për kontrolle në fermat me numër të lartë të të imtave, por jo vetëm.

“Dje kemi organizuar grupet e punës të cilët kanë monitoruar dhe situata është e qetë. Ndërsa aktualisht bagëtia janë në kullota verore dhe nuk kemi asnjë rast të dyshimtë”, tha inspektori.

Inspektori Gjana thekson gjithashtu se masat për ndalimin e tregtimit të kafshëve në tregun e gjësë së gjallë dhe transportit nga një fermë në tjetrën mbeten në fuqi dhe monitorohen rregullisht.

“Kemi ngritur grupet e punës në akset rrugore, në tregun e gjësë së gjallë dhe në thertore dhe në pikat kufitare”, tha Gjana.

Duke qenë se harta e kësaj sëmundjeje është zgjeruar dhe se  zonat kufitare përreth janë prekur, e rrjedhimisht rritet rreziku edhe ne Qarkun e Kukësit.

Gazetar: Dashmir Shehu

/rtsh.al/