Raporti përfundimtar për shtetin e së drejtës në Shqipëri është publikuar nga Komisioni Evropian. 

Në këtë raport vlerësohet konsolidimi i situatës në Shqipëri, por theksohet se vijojnë problematikat që erdhën pas procesit të vetingut në gjyqësor. Raporti vlerëson edhe miratimin e Strategjisë kundër Korrupsionit si një hap i rëndësishëm në rrugëtimin e vendit drejt BE-së.

“Strategjia kundër Korrupsionit për vitet 2024–2030 është miratuar. Korniza ligjore për të luftuar korrupsionin është gjerësisht në fuqi, por legjislacioni për parandalimin e korrupsionit duhet të plotësohet,” thuhet në raport.

Me nota pozitive vlerësohet edhe puna e deritanishme e Strukturës së Posaçme Antikorrupsion. 

“Struktura e Posaçme kundër Korrupsionit (SPAK) konsolidoi më tej rezultatet e saj pozitive në luftën kundër korrupsionit të nivelit të lartë dhe bëri përparim të prekshëm drejt një rekordi të fortë në këtë luftë,” thekson raporti i KE-së.

Në këtë raport vihet në dukje se puna e Policisë së Shtetit kundër korrupsionit ka nevojë për përmirësim.

“Policia e Shtetit mbetet e ndjeshme ndaj korrupsionit. Mangësitë mbeten në lidhje me transparencën dhe me efektivitetin e mënyrës se si Inspektorati i Lartë për Deklarimin dhe Auditimin e Pasurive dhe Konfliktit të Interesit kontrollon deklaratat e pasurive dhe interesave,” thuhet në raportin e Komisionit Europian.

Shqetësime paraqiten edhe në lidhje me punën e Parlamentit.

“Gjykata Kushtetuese vazhdon të funksionojë në mënyrë efektive, ndërsa ka shqetësime në lidhje me dështimin e vazhdueshëm të Parlamentit për të përmbushur disa nga vendimet e saj dhe pasiguritë ligjore mbi kohëzgjatjen e saktë të mandatit të anëtarëve. Mandatet e Avokatit të Popullit dhe Komisionerit kundër Diskriminimit ende nuk janë rinovuar dhe disa pengesa për punën e tyre efektive vazhdojnë të jenë të pranishme,” veçon raporti.

Organizatat e shoqërisë civile mbeten përgjithësisht të lira për të vepruar, por përballen ende me sfida, përfshirë kërkesat për regjistrim dhe mungesën e financimit publik.

Gazetare: Amela Koçerri

/rtsh.al/