Një gjyqtar federal ka lëshuar të enjten një bllokim të ri mbarëkombëtar kundër urdhrit ekzekutiv të Presidentit Donald Trump, i cili kërkon t’i japë fund shtetësisë së fituar me të drejtë lindjeje. Ky vendim vjen në një kohë kyçe, pasi Gjykata Supreme muajin e kaluar kufizoi fuqinë e gjyqtarëve të gjykatave më të ulëta për të lëshuar urdhra gjyqësorë në të gjithë vendin.

Gjyqtari i distriktit amerikan, Joseph Laplante miratoi një kërkesë nga avokatët e të drejtave të imigracionit për të certifikuar një klasë mbarëkombëtare, e cila do të përbëhet nga të gjithë ata që do t’i privohet shtetësia.

Ai lëshoi një urdhër paraprak që bllokon për një kohë të pacaktuar zbatimin e urdhrit të Trump ndaj foshnjave të lindura dhe të palindura që do të prekeshin nga kjo politikë.

Gjatë seancës dëgjimore, gjykatësi Laplante theksoi rëndësinë e vendimit, duke deklaruar: “Heqja e shtetësisë amerikane dhe një ndryshim i menjëhershëm i politikës që ishte afatgjatë… ky është një dëm i pariparueshëm.” Ai shtoi se shtetësia amerikane “është privilegji më i madh që ekziston në botë”. Gjykatësi, i emëruar nga ish-Presidenti George W. Bush, tha se do ta pezullonte urdhrin e tij për disa ditë për t’i dhënë administratës Trump kohë për të apeluar vendimin.

Vendimi i Laplante mund të jetë një pengesë thelbësore ndaj politikës së Trump, sidomos pasi gjykatat e tjera përpiqen të rishikojnë vendimet e tyre në dritën e vendimit të Gjykatës Supreme. Në shkurt, Laplante kishte bllokuar për një kohë të pacaktuar administratën Trump nga zbatimi i urdhrit vetëm kundër anëtarëve të disa grupeve jofitimprurëse. Në atë kohë, ai shkroi se “Urdhri Ekzekutiv bie ndesh me tekstin e Amendamentit të Katërmbëdhjetë dhe precedentin shekullor të paprekur që e interpreton atë.”

Disa gjyqtarë të tjerë kanë vendosur gjithashtu se urdhri i Trump ishte jokushtetues, por urdhrat e tyre ishin zbatuar në të gjithë vendin, duke e shtyrë administratën të ngrinte një seri apelimesh që përfundimisht arritën në Gjykatën Supreme.

Seanca e së enjtes u përqendrua në kërkesën e avokatëve të të drejtave të imigracionit për të certifikuar një klasë individësh që do të përfshinte “të gjithë fëmijët aktualë dhe të ardhshëm” që do të prekeshin nga urdhri i Trump, si dhe prindërit e tyre. Vendimi i Laplante të enjten nuk i përfshiu prindërit në këtë klasë.

Cody Wofsy, një avokat i Unionit Amerikan për Liritë Civile (ACLU), i cili ndihmoi në ngritjen e dy rasteve në New Hampshire, theksoi: “Asnjë gjykatë në vend nuk ka rënë dakord me administratën mbi çështjen themelore kushtetuese. Çdo gjykatë ka thënë se ky urdhër është jokushtetues, dhe kështu ne presim të fitojmë mbi këtë çështje.”

Përfaqësuesit e propozuar në këtë rast përfshijnë një azilkërkuese nga Hondurasi, “Barbara”, e cila pret një fëmijë në tetor, dhe një burrë brazilian, “Mark”, gruaja e të cilit lindi në mars dhe nuk ndodhet ligjërisht në SHBA.

Avokatët paralajmëruan se nëse urdhri lihet në fuqi, këta fëmijë do të përballen me “pengesa të shumta në jetën në Shtetet e Bashkuara, duke përfshirë stigmën dhe pashtetësinë e mundshme; humbjen e të drejtës së tyre për të votuar, për të shërbyer në juri federale dhe në shumë zyra të zgjedhura, dhe për të punuar në vende të ndryshme federale; pamundësinë për të marrë pjesë në programe të ndryshme federale; dhe arrestimin, ndalimin dhe deportimin e mundshëm në vende që mund të mos i kenë parë kurrë.”

Urdhri ekzekutiv i nënshkruar nga Trump më 20 janar, i titulluar “MBROJTJA E KUPTIMIT DHE VLERËS SË SHTETËSISË AMERIKANE”, thotë se qeveria federale nuk do të “lëshojë dokumente që njohin shtetësinë e Shteteve të Bashkuara” për asnjë fëmijë të lindur në tokën amerikane nga prindër që kanë qenë në vend në mënyrë të paligjshme ose kanë qenë në shtete ligjërisht, por përkohësisht.

Gjykata Supreme, në vendimin e saj të 27 qershorit, tha se administrata nuk mund të fillojë zbatimin e urdhrit për 30 ditë, megjithëse qeverisë i lejohet të fillojë të hartojë udhëzime se si do të zbatohet politika. Më shumë procedura gjyqësore priten në ditët dhe javët në vijim, por është e paqartë nëse ndonjë nga këto gjykata do t’i ngushtojë urdhrat e tyre përpara se Trumpit t’i lejohet të zbatojë politikën e të drejtës së lindjes. CNN

/rtsh.al/