Prej tri vitesh personat vulnerabël ndaj qasjes në sistemin e drejtësisë kanë një derë ku të trokasin. Janë zyrat e Ndihmës Juridike Parësore Falas, nisur si projekt i Ministrisë së Drejtësisë dhe UNDP, Organizatës së Kombeve të Bashkuara për Zhvillim Ndërkombëtar.

Një qendër e tillë, prej korrikut të vitit 2022, funksionon edhe në Elbasan. Tashmë është pjesë e strukturës e drejtorisë juridike falas dhe me mbështetje financiare nga buxheti i shtetit:

 “Ofron ndihmë në përpilimin e kërkesave dhe ankesave drejtuar institucioneve të ndryshme. Ofron këshillim për zgjidhjen e çështjes me ndërmjetësim dhe ofrohet edhe dhënia e një avokati falas dhe qytetarët përjashtohen nga tarifat dhe çdo gjë ofrohet falas dhe financohet nga buxheti i shtetit”, u shpreh Arjan Bala, punonjës me Trajnim të Posaçëm, Prokuroria Shkallës Parë Elbasan.

Nga ky shërbim përfitojnë të gjithë ata shtetas të cilët janë në kushtet e pamundësisë ekonomike, apo bëjnë pjesë në kategori të veçanta, si viktimat e dhunës, të miturit në konflikt me ligjin, persona me aftësi të kufizuara fizike apo mendore.

“Kërkesat më të shumta kanë qenë për zgjidhje të martesave, çështjet e pronësisë, problemet me pensionet që nuk u njihen vitet e punës”, tha Bala.

Që nga hapja e kësaj Qendre, në tre vjet, 606 qytetarë nga i gjithë qarku i Elbasanit kanë marrë ndihmë juridike falas.

Gazetar: E. Molla

/rtsh.al/