Presidenti i SHBA-së, Donald Trump, ka mbërritur këtë mbrëmje në Skoci me bordin e Air Force One, për një vizitë private pesë-ditore. Gjatë kësaj vizite, ai pritet të inspektojë dy resorte luksoze në pronësi të familjes së tij dhe të zhvillojë takime politike joformale me Presidenten e Komisionit Evropian, Ursula von der Leyen, dhe Kryeministrin britanik, Keir Starmer.

Trump, nëna e të cilit ishte me prejardhje skoceze, u prit në aeroportin Prestwick, pranë Glasgout, nga kreu i qeverisë lokale të Skocisë, John Swinney. Presidenti amerikan shprehu dëshirën për të diskutuar disa nga nismat e tij ekonomike me Swinney.

Plani i tij përfshin më pas një transferim me helikopter në Turnberry, në Ayrshire, ku Donald Trump zotëron një nga dy resortet e tij të golfit.

“Skocia është tashmë e madhe”, protestuesit përshëndesin Trump me mesazhe ironike

Jashtë aeroportit, një grup i parë protestuesish ishin mbledhur për të shprehur kundërshtinë e tyre ndaj vizitës. Disa prej tyre mbanin kapele të kuqe, të ngjashme me ato të mbështetësve amerikanë të lëvizjes MAGA (Make America Great Again), por me një ndryshim domethënës: fjalët “Skocia është tashmë e madhe” të shkruara mbi to. Kjo shprehje ironike shërben si një shenjë refuzimi ndaj fokusit të presidentit-manjat te promovimi i bizneseve të tij private në kombin verior të Mbretërisë së Bashkuar.

Vizita e Trump në Skoci pritet të shoqërohet me protesta të tjera gjatë ditëve në vijim, ndërsa vëmendja do të përqendrohet si te takimet e tij politike, ashtu edhe te aktivitetet private në pronat e tij. ANSA

/rtsh.al/