Të paktën 11 persona kanë mbetur të plagosur pas një sulmi me thikë të ndodhur në një supermarket në Michigan, SHBA. Autori i dyshuar, një 42-vjeçar nga Michigan, u arrestua nga forcat e rendit pak minuta pas ngjarjes.

Sherifi i Qarkut Grand Traverse, Michael Shea, tha në një konferencë për shtyp se nuk ka të dhëna që të sugjerojnë përfshirjen e personave të tjerë.

 “Duket se ka qenë një akt i rastësishëm”, tha ai.

Nga të plagosurit, tre po i nënshtrohen ndërhyrjeve kirurgjikale. Sipas autoriteteve, gjashtë janë meshkuj dhe pesë femra.

Guvernatorja e Miçiganit, Gretchen Whitmer, reagoi përmes një postimi në rrjetin X, duke e quajtur ngjarjen “lajm të tmerrshëm”. Ajo tha se ishte në kontakt me forcat e rendit dhe shprehu mirënjohje për reagimin e shpejtë të ekipeve të ndihmës së parë.

“Mendimet tona janë me të plagosurit dhe komunitetin që po përjeton këtë akt brutal dhune”, u shpreh Whitmer.

Hetimet për motivet e mundshme të sulmit vijojnë.

/rtsh.al/