Një nga projektligjet e para me të cilat do të merret Parlamenti në shtator do të jetë ai “Për parandalimin e konfliktit të interesave në ushtrimin e funksioneve publike”.

Projekti i ri do të jetë një sintezë e propozimeve që erdhën nga komisioni i drejtuar prej Fatmir Xhafajt, Inspektoratit të Lartë të Deklarimit të Pasurive, nga disa organizata të shoqërisë civile, partnerët ndërkombëtarë dhe ekspertë të fushës.

Për shkak të procesit të bisedimeve të anëtarësimit me Bashkimin Evropian, Shqipëria ka detyrimin të përcaktojë qartë në një ligj të ri se cilat institucione do të preken dhe cilët persona do i nënshtrohen këtij mekanizmi kontrollues.

Sipas ekspertëve, është e nevojshme që ligji i ri të jetë i thjeshtë dhe i zbatueshëm lehtësisht, dhe të zgjidhë njëherë e mirë paqartësitë që janë krijuar ndër vite se kur merr vlerë ligjore togfjalëshi “konflikt interesi”, cilët janë personat që cilësohen si të lidhur me zyrtarët e shtetit apo funksionarët publikë të zgjedhur dhe, mbi të gjitha, si përkufizohet ekuilibri ligjor mes interesave private dhe atyre të drejtuesve shtetërorë e familjarëve të tyre.

Projektligji i ri është premtuar se do të jetë në harmoni me ligjin ekzistues për mbrojtjen e të dhënave personale.

Gazetare: Sonila Agostini

/rtsh.al/