Policia e Korçës ka vënë në pranga 39-vjeçarin G.M., i cili ishte shpallur në kërkim si pjesë e operacionit “Matrikulli”, të zhvilluar një javë më parë. Specialistët për Hetimin e Krimeve Ekonomike dhe Financiare e kapën dhe e ndaluan shtetasin, banues në Bilisht, pas një urdhër ndalimi të lëshuar nga Prokuroria e Korçës.

Ai akuzohet për veprat penale “Kontrabanda me mallra të tjera”, “Tregtimi apo transportimi i mallrave kontrabandë” dhe “Fshehja e të ardhurave”.

Sipas Policisë, G.M. dyshohet se ka kontrabanduar nga Greqia 100 bagëti të imëta dhe 20 gjedhë. Më pas, në bashkëpunim me katër veterinerë të arrestuar gjatë operacionit “Matrikulli” më 23 korrik, ai dyshohet se i ka matrikulluar bagëtitë dhe gjedhët me matrikulla të marra nga zyra e veterinarisë në Devoll.

Materialet procedurale i kanë kaluar prokurorisë për veprime të mëtejshme. Arrestimi i 39-vjeçarit është pjesë e vazhdimit të operacioneve për kapjen e shtetasve në kërkim.

/rtsh.al/