Situata nga zjarret në vend duket se po shkon drejt përmirësimit, teksa Ministria e Mbrojtjes bën me dije se 3 vatra janë aktive dhe dy të tjera janë nën monitorim. Sipas Ministrisë, gjatë 24 orëve u identifikuan 14 vatra, por 9 prej tyre janë shuar plotësisht.   

Në pyllin e Pishë-Poros në Vlorë, zjarri i rënë që prej datës 25 gusht vijon të jetë aktiv, por me intensitet të ulët, duke djegur kryesisht trungje brenda vatrës. Sot në terren po punojnë 30 forca zjarrfikëse e bashkiake dhe 20 efektivë të FA me 3 automjete.

Në fshatin Miras, bashkia Devoll, vijon zjarri në një sipërfaqe pyjore, ku po punojnë rreth 70 forca vendore të MZSH, bashkisë dhe vullnetarë.

Nën monitorim janë zjarret e rëna në Bogovë të Skraparit dhe vatrat e izoluara në zonën e Kodrave të Caushit në Pezë Helmas.

Vatra e riaktivizuar në zonën e piramidave 14–15 është izoluar dhe po monitorohet nga forcat operacionale.

/rtsh.al/