Një ditë pas miratimit në Kuvend të kabinetit të ri qeveritar, kryeministri Edi Rama dhe 16 ministrat janë betuar sot në Presidencë.

Pas betimit, sikurse është bërë traditë, Kryeministri dhe kabineti i ri e përshkuan në këmbë bulevardin “Dëshmorët e Kombit” deri në selinë e qeverisë, ku u mbajt edhe mbledhja e parë. Kryefjala e mandatit të kësaj qeverie do të jetë “Shqipëria 2030 në Bashkimin Europian“.

Të premten e kaluar, më 12 shtator, Edi Rama u dekretua nga presidenti Bajram Begaj për herë të katërt si kryeministër i Shqipërisë, prej ngjitjes në krye të pushtetit ekzekutiv në vitin 2013.

Programi i qeverisë dhe anëtarët e Këshillit Ministror u miratuan me 82 vota ditën e djeshme (18 shtator), në një seancë të shoqëruar me tensione të forta.

Edhe pse ishte parashikuar një mbledhje maratonë e Kuvendit, e gjitha zgjati vetëm 25 minuta. Opozita kontestoi një transmetim filmik të ministres virtuale “Diella”, duke bllokuar foltoren dhe duke mos e lejuar kryeministrin Rama që të vijonte më tej me prezantimin e programit qeverisës. Kjo bëri që kreu i Kuvendit të kalonte menjëherë për votim programin dhe përbërjen e re të kabinetit qeveritar.  

Ndërkohë, PD ka kërkuar përsëritjen e seancës dhe po ashtu ka njoftuar se do të fillojë procedurat për mocion për shkarkimin e Peleshit si kryetar i Kuvendit.

Përbërja e Qeverisë

1. Edi Rama, Kryeministër
   Kryeministri ushtron edhe përgjegjësitë për ngritjen dhe funksionimin e Ministrit Virtual të Inteligjencës Artificiale, “Diella”
2. Belinda Balluku, Zëvendëskryeministër dhe Ministër i Infrastrukturës dhe Energjisë
3. Elisa Spiropali, Ministër për Evropën dhe Punët e Jashtme
4. Albana Koçiu, Ministër i Punëve të Brendshme
5. Pirro Vengu, Ministër i Mbrojtjes
6. Petrit Malaj, Ministër i Financave
7. Besfort Lamallari, Ministër i Drejtësisë
8. Mirela Kumbaro Furxhi, Ministër i Arsimit
9. Evis Sala, Ministër i Shëndetësisë dhe Mirëqenies Sociale
10. Andis Salla, Ministër i Bujqësisë dhe Zhvillimit Rural
11. Delina Ibrahimaj, Ministër i Ekonomisë dhe Inovacionit
12. Blendi Gonxhja, Ministër i Turizmit, Kulturës dhe Sportit
13. Sofjan Jaupaj, Ministër i Mjedisit
14. Majlinda Dhuka, Ministër Shteti dhe Kryenegociator
15. Adea Pirdeni, Ministër i Shtetit për Administratën Publike dhe Antikorrupsionin
16. Toni Gogu, Ministër i Shtetit për Marrëdhëniet me Parlamentin
17. Ervin Demo, Ministër i Shtetit për Pushtetin Vendor

/rtsh.al/