Në 81-vjetorin e Çlirimit të vendit, Kryetari i Kuvendit, Niko Peleshi, zhvilloi homazhe në Varrezat e Dëshmorëve të Kombit, ku nderoi kujtimin e luftëtarëve që sakrifikuan jetën për lirinë e Shqipërisë.

Gjatë mesazhit të tij, Kryetari Peleshi theksoi se “Sot nderojmë çlirimtarët e atdheut, që, me heroizëm dhe trimëri, i hapën rrugën lirisë së Shqipërisë. Sakrificat e popullit shqiptar dhe gjaku i dëshmorëve të Luftës Antifashiste Nacionalçlirimtare shkruajtën një nga kapitujt më të rëndësishëm të historisë sonë.”

Peleshi shtoi se trashëgimia e të rënëve mbetet një busull morale për brezat e sotëm: “Trashëgimia e tyre vazhdon të jetë një pikë referimi për brezat, një kujtim i gjallë për çmimin që ka arritja e lirisë, dhe një mësim për përgjegjësinë tonë për ta mbrojtur atë.”

Ceremonia u zhvillua në praninë e përfaqësuesve të institucioneve shtetërore, veteranëve e pasardhësve, familjarëve të dëshmorëve dhe qytetarëve, si pjesë e aktiviteteve zyrtare të përvjetorit të Çlirimit.

/rtsh.al/