Ish-deputeti demokrat Ervin Salianji ka deklaruar se Partia Demokratike ka urdhëruar largimin e tij si drejtues politik në njësinë nr. 6 në Tiranë. Por ndaj këtij pretendimi ka reaguar Sekretari i Përgjithshëm i PD‑së, Flamur Noka, i cili mohon që Salianji të ketë pasur ndonjëherë këtë rol.

Sipas Nokës, drejtuesi politik i PD‑së në Tiranë ka qenë Belind Këlliçi, ndërsa Salianji ka qenë vetëm i deleguar për fushatën e pritshme të zgjedhjeve të pjesshme vendore. Me ndërprerjen e fushatës, PD, sipas Nokës, ka tërhequr të gjithë të deleguarit.

“Ervin Salianji nuk ka qenë drejtues politik. Drejtues politik në Tiranë ka qenë Belind Këlliçi. Salianji ka qenë i deleguar për fushatën, dhe me ndërprerjen e saj, të deleguarit janë tërhequr,” deklaron Noka.

Ai shton se largimi i Salianjit nuk lidhet me vendime të brendshme politike, por me veprimet e tij të mëparshme.

“Siç e dini, Salianji me aktivitetin e Elbasanit të realizuar nga përfaqësuesi i botës së krimit Suel Çela është vetëpërjashtuar,” thekson Noka në reagimin e tij.

/rtsh.al/