Shërbimi zjarrfikës në Shkodër, prej datës 18 dhjetor, ka nisur kontrollet në subjektet që tregtojnë lëndë piroteknike.

Shefi i Sektorit të Parandalimit, Gazmend Muçmeraj, tregon mbi dokumentacionin që subjektet duhet të kenë për të ushtruar këtë aktivitet.

“Janë pajisur me dokumentacion përkatës përsa i përket shërbimit zjarrfikës. Me miratimet e projekteve kundër zjarrit dhe lëshimin e certifikatës kundrejt zbatimit të këtij projekti. Këto biznese kanë certifikatat e zjarrit, në ambientet e tyre kanë pajisjet dhe mbrojtjet kundër zjarrit” – u shpreh shefi i Sektorit të Parandalimit, MZSH Shkodër, Gazmend Muçmeraj.

Por, sipas drejtorit të Repartit Zjarrfikës, krahas dokumentacionit, subjektet duhet të respektojnë në mënyrë rigoroze edhe moshën e personave të cilëve u tregtohen këto produkte.

Ndërsa drejtori i MZSH Shkodër, Agim Ponari, u shpreh se “Grupi F1 mund të përdoret edhe për fëmijët mbi 12 vjeç, nuk paraqesin rrezik, mjafton që të hidhen në hapësirat e jashtme. Ndërsa grupet e tjera duhet të jenë mbi 18 vjeç përdoruesit e tyre. Nëse shitësit ambulantë që tregtojnë këto lëndë piroteknike nën kësaj moshe dhe konstatohet nga grupet e përdorimit në terren, do të mbajnë përgjegjësi ligjore.”

Krahas Repartit Zjarrfikës, përgjegjësi kanë edhe institucione të tjera, si Inspektorati Teknik, Tatim-Taksat dhe Krimi Ekonomik, për të mbikëqyrur origjinën, dokumentacionin dhe tregtimin e lëndëve piroteknike gjatë periudhës së fundvitit.

Gazetare: M. Gjoni

/rtsh.al/