Aksi rrugor Qafë Thore–Theth, i bllokuar për shkak të reshjeve të dendura të dëborës, është tashmë i hapur për qarkullim.

Kryetari i Bashkisë së Shkodrës, Benet Beci, konfirmoi se zhbllokimi u arrit falë angazhimit të strukturave përgjegjëse dhe punës së pandërprerë në terren.

“Qarkullimi vijon normalisht, ndërsa ndërhyrjet kanë garantuar siguri për drejtuesit e mjeteve. Strukturat përgjegjëse mbeten në monitorim të vazhdueshëm, në varësi të kushteve të motit. Këshillohet lëvizje me kujdes dhe respektim i rregullave të sigurisë,” u shpreh Beci.

Më herët, kryetari i Bashkisë së Shkodrës, Benet Beci, njoftoi se nesër do të nisë ndërhyrja për hapjen e rrugës Kir–Shosh, e cila aktualisht është e bllokuar për shkak të rrëshqitjes së inertesh.

“Në vendin e quajtur Gështenja e Thaçit, në Njësinë Administrative Pult, pjesë e segmentit Kir–Shosh, është evidentuar rrëshqitje inertesh që ka shkaktuar bllokimin e qarkullimit. Bashkia ka organizuar grupin e ndërhyrjes dhe do të nisë punën në terren për hapjen e segmentit dhe rikthimin e qarkullimit sa më shpejt të jetë e mundur,” tha Beci.

Ai u bëri thirrje qytetarëve që deri në përfundimin e punimeve të tregojnë kujdes dhe të shmangin lëvizjet në këtë aks.

“Jemi në ndjekje të situatës dhe do të informojmë në vijim për çdo zhvillim,” përfundoi Beci.

/rtsh.al/