Pas Senegalit, është Maroku që kalon në gjysmëfinale të Kupës së Afrikës. Në Rabat, në një çerekfinale plot me presion dhe histori, Maroku rrëmbeu skenën dhe nuk e lëshoi më.

Të zotët e shtëpisë, në kërkim të titullit që mungon prej gjysmë shekulli, nuk e lejuan Kamerunin “t’i kafshonte”, siç ka bërë shpesh, duke prishur festën e vendit organizator. Fitore 2-0 për marokenët, që presin të mësojnë kundërshtarin nga ndeshja Algjeri-Nigeri.

Ndeshja nisi me ritëm të lartë, ndërsa rreziku për Kamerunin vjen nga dyshja Hakimi-Ezzalzouli, që ndez duelin. Goli vjen në minutën e 26-të nga një goditje këndi, ku El Kaabi devijon me kokë dhe Brahim Diaz mbërrin i pari në trajektore, duke shënuar nga shumë afër. Me këtë gol konfirmohet fakti se me ish-lojtarin e Milanit në fushë Maroku e nis gjithmonë në avantazh.

Kameruni provon të riorganizohet, por pa mundur të rrezikojë portën e Bono. Maroku kërkon golin e sigurisë dhe në anën tjetër mbyll mirë hapësirat. Në fushë për vendësit futen dhe En Nesyri e Amrabat. Shpresat e Kamerunit marrin fund në minutën e 74-t, kur Saibari dyfishon shifrat. Maroku vazhdon përpara nën shenjën e Brahim Diaz.