Ndërsa Teherani zyrtar është përfshirë në një përplasje diplomatike me fuqitë perëndimore, Rusia ka nxituar të ofrojë mbështetjen e saj strategjike për Republikën Islamike.

Pasditen e sotme, Sekretari i Këshillit të Sigurisë Kombëtare të Rusisë, Sergei Shoigu, ka zhvilluar një bisedë telefonike me homologun e tij iranian, Ali Larijani. Në fokus të diskutimit ishin protestat që po tronditin Iranin dhe reagimi ndërkombëtar ndaj tyre.

Sipas agjencisë ruse RIA Novosti, e cila citon Këshillin e Sigurisë së Rusisë, dy zyrtarët e lartë ranë dakord të forcojnë bashkëpunimin në këtë periudhë krize.

“Palët ranë dakord të vazhdojnë kontaktet e ngushta dhe të koordinojnë qëndrimet e tyre për të garantuar sigurinë në rajon,” thuhet në njoftimin zyrtar.

Gjatë bisedës me Larijanin, Shoigu përcolli qëndrimin e Moskës lidhur me trazirat e brendshme në Iran. Rusia ka dënuar ashpër atë që e quan “përpjekje për të ndërhyrë në punët e brendshme të Iranit”, duke iu referuar hapur mbështetjes që shtetet perëndimore u kanë dhënë protestuesve iranianë.

Ky koordinim i nivelit të lartë Rusi-Iran vjen në të njëjtën ditë kur Teherani thirri ambasadorët e Francës, Gjermanisë, Italisë dhe Britanisë së Madhe për t’u dorëzuar notë proteste, duke sinjalizuar një ndarje të thellë gjeopolitike lidhur me krizën iraniane.

/rtsh.al/