Më 21 janar, Presidenti rus Vladimir Putin propozoi që Rusia të kontribuojë 1 miliard dollarë në Bordin e Paqes të presidentit amerikan Donald Trump, duke përdorur asetet ruse të ngrira në Shtetet e Bashkuara.

Sipas agjencisë ruse Interfax dhe burimeve të tjera si Reuters dhe Bloomberg kjo ide u shpreh gjatë një takimi me anëtarët e Këshillit të Sigurimit të Rusisë: “Edhe tani, para se të merret vendimi për anëtarësimin tonë dhe funksionimin e Bordit të Paqes, duke marrë parasysh marrëdhëniet e veçanta të Rusisë me popullin palestinez, ne mund, mendoj unë, të transferojmë një miliard dollarë amerikanë në Bordin e Paqes nga asetet ruse të ngrira nën administratën e mëparshme amerikane.”

Putin shtoi se fondet e mbetura nga këto asete të ngrira në SHBA mund të përdoren për rindërtimin e territoreve të prekura nga lufta midis Rusisë dhe Ukrainës, pas nënshkrimit të një marrëveshjeje paqeje.

“Përveç kësaj, fondet e mbetura nga asetet tona të ngrira në Shtetet e Bashkuara mund të përdoren gjithashtu për rindërtimin e territoreve të prekura nga luftime pas një marrëveshjeje paqeje midis Rusisë dhe Ukrainës. Kjo mundësi po diskutohet gjithashtu me përfaqësuesit e administratës amerikane”, tha ai.

Më 16 janar, Trump njoftoi krijimin e Bordit të Paqes, duke ftuar udhëheqës botërorë, përfshirë Putinin.

Sipas planit, vendet që duan anëtarësim të përhershëm duhet të kontribuojnë të paktën 1 miliard dollarë.  SHBA mban rreth 5 miliardë dollarë asete ruse të ngrira.

Ky propozim i Putin-it vjen në kuadër të diskutimeve për paqen në Gazë dhe Ukrainë, ku bordi synon fillimisht të mbikëqyrë rindërtimin e Gazës, por me ambicie më të gjera globale.

Rusia ende nuk ka konfirmuar zyrtarisht anëtarësimin, por po e studion idenë, dhe oferta shihet si një mënyrë për të shfrytëzuar asetet e ngrira për qëllime humanitare dhe diplomatike, ndërsa bisedimet me emisarët amerikanë si Steve Witkoff dhe Jared Kushner vazhdojnë.

/rtsh.al/