Shtetet e Bashkuara kanë kërkuar zyrtarisht hartimin e një marrëveshjeje të re bërthamore, pasi traktati historik me Rusinë skadoi mesnatën e së enjtes. Moska sugjeroi zgjatjen e afatit edhe për një vit, por presidenti Donald Trump e refuzoi këtë propozim duke kërkuar një rregullore të re.

Zyrtarët amerikanë deklaruan në Gjenevë se marrëveshjet e vjetra dypalëshe janë tashmë të pamjaftueshme për sigurinë globale në vitin 2026. Uashingtoni këmbëngul që në traktatin e ri të përfshihet patjetër edhe Kina, e cila po rrit me shpejtësi arsenalin e saj atomik.

Megjithatë, Pekini zyrtar ka refuzuar kategorikisht të bëhet pjesë e negociatave, duke pretenduar se zotëron shumë më pak koka bërthamore. SHBA-të hedhin akuza se pala kineze po kryen teste të fshehta dhe parashikojnë një rrezik në rritje brenda kësaj dekade. Nga ana tjetër, Rusia u shpreh e hapur për diskutime, por kërkoi që në tryezë të ulen edhe Britania e Madhe me Francën.

Kjo përplasje diplomatike ka lënë aktualisht botën pa një dokument ligjor që kufizon armët më të rrezikshme të planetit. Situata mbetet mjaft e tensionuar pasi skadimi i traktatit New START i hap rrugë një gare të re dhe të pakontrolluar armatimesh. Ekspertët ndërkombëtarë paralajmërojnë se pa një marrëveshje të shpejtë, balanca e fuqive botërore mund të destabilizohet ndjeshëm.

Gazetar: A. Mata

/rtsh.al/