Lojërat Olimpike Dimërore “Milano–Cortina 2026” kanë nisur zyrtarisht më 6 shkurt, duke sjellë emocione të forta, gara spektakolare, por dhe momente dramatike, që tashmë kanë prodhuar disa nga imazhet më mbresëlënëse të sportit dimëror.

Ylli amerikan i skijimit, Lindsey Vonn, u transportua me helikopter në spital pasi u rrëzua vetëm rreth 13 sekonda pas nisjes së garës së saj të dielën. Ndërkohë, shoqja e saj e skuadrës, Breezy Johnson, i dhuroi Shteteve të Bashkuara medaljen e parë të artë në këto Lojëra Olimpike.

Italiania Francesca Lollobrigida shkëlqeu në patinazhin me shpejtësi, duke fituar medaljen e artë në garën e 3,000 metrave për femra dhe duke thyer njëkohësisht rekordin olimpik. Zvicra siguroi medaljen e parë të artë të Lojërave, teksa garat u zhvilluan në Italinë veriore.

Gjatë dy javëve të ardhshme, atletët më të mirë nga e gjithë bota do të garojnë për medaljet olimpike në 16 disiplina sportive, në një nga edicionet më të pritura të Lojërave Dimërore.

Emocione të veçanta ka edhe për Shqipërinë, e cila përfaqësohet nga katër skiatorë: Lara Colturi, Deni Xhepa, Lisa Brunga dhe Semire Dauti.

Të gjitha garat dhe momentet kryesore të Lojërave Olimpike Dimërore “Milano–Cortina 2026” transmetohen në RTSH 1, RTSH2 dhe RTSH Sport.

/rtsh.al/