Irani ka hapur zyrtarisht derën për një marrëveshje të re bërthamore me Shtetet e Bashkuara por me një kusht të prerë. Zëvendësministri i Jashtëm iranian, Majid Takht-Ravanchi, deklaroi për mediat se Teherani është gati për bisedime nëse Uashingtoni heq sanksionet ekonomike.

Sipas tij, topi tashmë është në anën amerikane për të vërtetuar se ata e duan vërtet një marrëveshje finale. “Ne jemi të gatshëm të flasim për programin tonë bërthamor, por sanksionet duhet të jenë patjetër në tavolinë,” u shpreh zyrtari iranian. Këto deklarata vijnë vetëm pak ditë përpara rundit të ri të bisedimeve që do të mbahen në Gjenevë me ndërmjetësimin e Omanit.

Delegacioni amerikan pritet të kryesohet nga emra të rëndësishëm si Steve Witkoff dhe Jared Kushner për të gjetur një gjuhë të përbashkët. Nga ana tjetër, Irani ka ofruar si shenjë vullneti hollimin e uraniumit të pasuruar, por nuk pranon eliminimin e plotë të tij. Ndërkohë, presidenti Donald Trump i ka cilësuar bisedimet fillestare si pozitive, ndonëse nuk i ka kursyer paralajmërimet e forta.

Ai konfirmoi nisjen e një aeroplanmbajtëseje të dytë drejt Detit Arabik, duke rritur presionin ushtarak ndaj regjimit të Teheranit. Tensionet mbeten të larta pasi SHBA-ja dhe Izraeli goditën objektet bërthamore iraniane gjatë një fushate bombardimesh vitin e kaluar.

Kreu i Agjencisë për Energji Bërthamore, Rafael Grossi, thotë se infrastruktura bërthamore e Iranit ka pësuar dëmtime të rënda pas sulmeve. Situata mbetet delikate, ndërsa bota pret të shohë nëse diplomacia do të arrijë të ndalë përshkallëzimin e mëtejshëm të konfliktit.

Gazetar: A. Mata

/rtsh.al/