Presidenti ukrainas Volodymyr Zelensky ka ofruar dërgimin e operatorëve më të mirë të dronëve të Ukrainës në Lindjen e Mesme, nëse udhëheqësit e Gjirit arrijnë të bindin Rusinë për një armëpushim njëmujor.

Zelensky tha se vendet e Lindjes së Mesme kanë marrëdhënie të ngushta me Moskën dhe mund të përdorin ndikimin e tyre për të kërkuar një pauzë të përkohshme në luftë. “Udhëheqësit e Lindjes së Mesme duhet t’u kërkojnë rusëve të zbatojnë një armëpushim njëmujor. Gjatë kësaj kohe, Ukraina do të dërgonte operatorët e saj më të mirë të interceptorëve të dronëve për të mbrojtur civilët,” u shpreh ai.

Që nga fillimi i pushtimit rus në shkallë të plotë në vitin 2022, Moska ka përdorur mbi 57,000 dronë Shahed të prodhuar nga Irani kundër Ukrainës. Këta dronë kamikaz kanë shkaktuar dëme të mëdha në infrastrukturë dhe viktima mes civilëve.

Presidenti rus Vladimir Putin, ndërkohë, është përpjekur të paraqitet si paqebërës në konflikt, duke zhvilluar telefonata me udhëheqës të vendeve të Gjirit dhe aleatin e tij të ngushtë, Iranin.

Telegraph shkruan se ky propozim i Zelenskyt synon të lidhë diplomacinë rajonale me mbrojtjen praktike të civilëve, duke ofruar ekspertizën ukrainase në interceptimin e dronëve iranianë në këmbim të një armëpushimi të përkohshëm.

/rtsh.al/