Menaxhimi i resurseve peshkore në Liqenin e Shkodrës është përmirësuar dhe aktualisht situata konsiderohet nën kontroll dhe e qëndrueshme. Sipas specialistëve të peshkimit, disa lloje peshqish që më parë ishin në rënie të numrit po shfaqin shenja përmirësimi.

“Për resurset peshkore kanë pasur qëndrueshmëri dhe nga viti në vit kontrollet për ruajtjen e liqenit janë shtuar. Liqeni i Shkodrës ka speciet e veta autoktone”, u shpreh Arjan Çinari, Drejtues i Organizatës së Menaxhim Peshkimit.

Në kuadër të mbrojtjes së resurseve peshkore, duke nisur nga fillimi i prillit do të aplikohet edhe ndalimi i peshkimit për një periudhë të caktuar, një masë që konsiderohet shumë e rëndësishme për ripërtëritjen e specieve.

Institucionet përgjegjëse për menaxhimin e peshkimit theksojnë se kontrollet do të vijojnë në bashkëpunim me strukturat e tjera ligj zbatuese, si policia, policia kufitare, policia bashkiake dhe inspektoratet përkatëse, për të garantuar mbrojtjen dhe menaxhimin e qëndrueshëm të resurseve peshkore në Liqenin e Shkodrës.

Gazetar: M. Rakaj  

/rtsh.al/