Presidenti i Shteteve të Bashkuara të Amerikës, Donald Trump, ka ripërtërirë thirrjen për veprim të përbashkët ndërkombëtar në mbrojtje të Ngushticës së Hormuzit, duke kërkuar që vendet që varen nga ky korridor strategjik të bashkojnë forcat kundër përpjekjeve iraniane për ta mbyllur atë.

Vetëm disa orë pasi deklaroi se shpreson që Mbretëria e Bashkuar, Kina dhe vende të tjera të dërgojnë anije luftarake në rajon, Trump theksoi se “vendet që marrin naftë përmes Ngushticës së Hormuzit duhet të kujdesen për atë kalim”.

Ai u shpreh se SHBA-të kanë “mundur dhe shkatërruar plotësisht Iranin, si ushtarakisht, ekonomikisht dhe në çdo mënyrë tjetër”, duke nënvizuar se Uashingtoni është i gatshëm të ndihmojë dhe të koordinojë vendet e tjera që të sigurohet një proces i shpejtë dhe pa probleme.

“Ky duhej të kishte qenë gjithmonë një përpjekje ekipore, dhe tani do të jetë – do ta bashkojë botën drejt Harmonisë, Sigurisë dhe Paqes së Përjetshme,” tha Trump.

Thirrja e presidentit amerikan vjen në një kohë kur tensionet në rajonin e Gjirit Persik mbeten të larta, ndërsa Ngushtica e Hormuzit, një nga korridoret më të rëndësishme të transportit të naftës në botë, shihet si pikë kyçe për sigurinë energjetike globale.

/rtsh.al/