I ftuar në emisionin “3D” të gazetarit Alban Dudushi në ekranin e RTSH-së, avokati Besart Logu ka analizuar dinamikat më të fundit brenda kampit opozitar, nën temën e diskutimit “PS-PD, muskujt politikë”.

Sipas Logut, lidershipi i Partisë Demokratike po tregon shenja të qarta të një “reflektimi”, duke u distancuar nga eksperimentet me kandidatë të ashtuquajtur “jopolitikë” për t’u rikthyer te një përfaqësim i mirëfilltë partiak.

Gjatë fjalës së tij, avokati theksoi se vendimi i PD-së nuk është i lidhur me individë të caktuar, por është një rishikim thelbësor i strategjisë. Duke iu referuar përpjekjes së mëparshme të opozitës me figura nga jashtë politikës, si rasti i Binajt, Logu argumentoi se ai model tregoi kufizime të theksuara në terren.

“Kemi një qëndrim të ri të PD-së për një përfaqësim me kandidat politik në garën për Bashkinë e Tiranës. Kjo s’ka të bëjë me emrin e Binajt. Lidershipi ka reflektuar ndaj kërkesave të strukturave të PD-së, kjo sepse edhe kandidatura që u shfaq më parë nuk arriti të mobilizonte strukturat,” u shpreh Logu.

Roli drejtues i PD-së dhe refuzimi i imponimeve

Një pikë thelbësore e analizës së avokatit ishte pesha dhe autoriteti i Partisë Demokratike brenda spektrit opozitar. Ai theksoi se si forca kryesore e opozitës, PD nuk duhet të lejojë që agjenda ose kriteret e kandidatëve t’i diktohen nga aktorë me peshë më të vogël elektorale.

Sipas tij, baza dhe anëtarësia kanë qenë të qarta në kërkesën e tyre për një figurë përfaqësuese politike.

“Demokratët janë forca e parë politike opozitare. Nuk mund t’u imponohet nga parti më të vogla ose fraksione të tjera opozitare modele dhe kritere kandidatësh jashtë kandidatëve politikë të PD-së,” theksoi ai.

/rtsh.al/