Drejtoria Vendore e Policisë Tiranë ka njoftuar arrestimin e dy personave në kuadër të operacionit të koduar “Same”, një ndërhyrje e fokusuar në goditjen e rrjeteve të shpërndarjes së lëndëve narkotike. Gjatë këtij operacioni, i cili u shtri në Tiranë dhe në Krujë, autoritetet sekuestruan sasi kokaine dhe kanabisi të destinuara për tregun vendas.

Sipas të dhënave zyrtare, rasti i parë u shënua në Tiranë, ku u vu në pranga shtetasi A. K., 30 vjeç. Forcat e rendit e ndaluan këtë të fundit në rrugën “Mine Peza” teksa drejtonte automjetin e tij. Gjatë kontrollit në mjet u gjet një sasi e dyshuar si lëndë narkotike e llojit kokainë. Një sasi tjetër e së njëjtës lëndë u gjet më pas gjatë kontrollit në banesën e tij me qira, të cilën 30-vjeçari dyshohet se e zotëronte me qëllim shitjen.

Rasti i dytë u regjistrua në qytetin e Krujës, me arrestimin e shtetasit A. M., 19 vjeç. Gjatë kontrollit të ushtruar në banesën e tij, shërbimet e policisë gjetën dhe sekuestruan 256 gramë lëndë të dyshuar si Cannabis Sativa. Sipas hetimeve paraprake, lënda narkotike ishte përgatitur për t’u shpërndarë në zonën e Krujës.

Në cilësinë e provës materiale, autoritetet kanë sekuestruar sasitë e lëndëve narkotike (kokainë dhe cannabis sativa); aparatet celularë të dy të dyshuarve; automjetin e përdorur nga 30-vjeçari gjatë transportit.

Aksioni u koordinua nga Komisariati i Policisë Nr. 3 në Tiranë dhe ai i Krujës, në bashkëpunim të ngushtë me Seksionin për Hetimin e Narkotikëve pranë DVP Tiranë.

Materialet procedurale i janë përcjellë Prokurorisë për hetime të mëtejshme, me të dy personat që përballen me akuzën për veprën penale “Prodhimi dhe shitja e narkotikëve”.

/rtsh.al/