Komisioni për Çështjet Ligjore dhe Administratën Publike, në cilësinë e komisionit përgjegjës, ka zhvilluar sot seancat dëgjimore me kandidatët që synojnë plotësimin e dy vakancave për Komisionerë në Zyrën e Avokatit të Popullit.

Mbledhja u drejtua nga kryetari Ulsi Manja, i cili sqaroi procedurën ligjore të ndjekur pas përfundimit të mandatit të komisionerëve të deritanishëm, Ahmet Prençi dhe Olta Aliaj. Manja njoftoi se institucioni i Avokatit të Popullit ka përcjellë tashmë pranë Komisionit listën zyrtare dhe vlerësimin paraprak për kandidaturat, të ndara sipas seksioneve specifike.

Kandidaturat për Seksionet përkatëse

Gjatë dëgjesës u bënë publike emrat e kandidatëve që garojnë për dy seksione kyçe të institucionit:

1. Mekanizmi kombëtar për parandalimin e torturës.

Në këtë seksion, i cili mbulon mbrojtjen nga trajtimi ose dënimi i egër, çnjerëzor dhe poshtërues, garojnë:

Ahmet Prençi

Majlind Shkira

Firdes Shuli

Aldo Meçi

2. Mbrojtja dhe promovimi i të drejtave të fëmijëve:

Për këtë pozicion, kandidatët e vlerësuar janë:

Gentjana Zeneli

Jetmira Rragami

Alma Faskaj

(Kandidatja Kejsi Rizo, megjithëse pjesë e listës, nuk u paraqit në seancën dëgjimore)

Prezantimi i platformave

Kandidatët e pranishëm bënë një ekspoze të detajuar të formimit të tyre profesional dhe prezantuan platformat e tyre mbi vizionin për rolin e komisionerit. Diskutimet u përqendruan në funksionimin efikas të institucionit të Avokatit të Popullit dhe sfidat që presin këto seksione në mbrojtjen e të drejtave të njeriut.

Pas prezantimeve, kandidatët iu përgjigjën pyetjeve të deputetëve lidhur me qasjen e tyre ndaj rasteve specifike dhe integritetin institucional.

Hapi i radhës

Në përfundim të seancës, kryetari Ulsi Manja njoftoi se Komisioni do të vijojë në mbledhjet e ardhshme me procesin e përzgjedhjes së emrave fitues. Kandidaturat e përzgjedhura nga Komisioni i Ligjeve do t’i dërgohen më pas Kuvendit për shqyrtim dhe votim final në seancë plenare.

/rtsh.al/