Presidenti i Shteteve të Bashkuara, Donald Trump, njoftoi se armëpushimi mes Izraelit dhe Libanit është zgjatur me tre javë, pas një takimi të zhvilluar në Zyrën Ovale me përfaqësues të të dyja vendeve.

Në një postim në platformën Truth Social, Trump bëri të ditur se takimi, ku morën pjesë edhe zëvendëspresidenti JD Vance dhe Sekretari i Shtetit Marco Rubio, rezultoi “shumë i suksesshëm”.

“Shtetet e Bashkuara do të punojnë me Libanin për ta ndihmuar atë të mbrohet nga Hezbollahu”, shkroi Trump, duke e cilësuar takimin si “historik” dhe duke shtuar se pret të mirëpresë në të ardhmen kryeministrin izraelit Benjamin Netanyahu dhe presidentin libanez Joseph Aoun.

Megjithatë, mbeten dyshime për qëndrueshmërinë e armëpushimit. Ambasadori i Izraelit në OKB, Danny Danon, deklaroi se nuk është i sigurt nëse marrëveshja e re do ta ndalë plotësisht konfliktin me Hezbollahun, të mbështetur nga Irani.

“Qeveria libaneze nuk ka kontroll mbi Hezbollahun. Ata vazhdojnë të dërgojnë raketa dhe të përpiqen të sabotojnë armëpushimin”, tha ai, duke shtuar se Izraeli do të reagojë ndaj çdo kërcënimi.

Zgjatja e armëpushimit vjen pas një marrëveshjeje fillestare 10-ditore dhe në një kohë tensionesh të vazhdueshme në rajon. Ndërkohë, zhvillimet kanë ndikuar edhe në tregjet globale të energjisë: çmimet e naftës u rritën të premten në Azi, me Brent që u rrit në mbi 105.80 dollarë për fuçi.

Konflikti ka ndikuar edhe në transportin detar, pasi dërgesat përmes Strait of Hormuz mbeten kryesisht të ndërprera, duke shkaktuar shqetësime për furnizimin global me energji.

Nga ana e tij, Vance e cilësoi marrëveshjen si një “moment të madh dhe historik”, duke theksuar se negociatat e drejtpërdrejta mes Izraelit dhe Libanit – të parat që nga viti 1993 – nuk do të ishin të mundura pa përfshirjen direkte të Trump.

/rtsh.al/