Reagimi i shpejtë i strukturave të Policisë së Vlorës ka çuar në arrestimin e një të riu, i cili akuzohet për vjedhjen e një mjeti motorik dhe mbajtjen e armëve të ftohta. Operacioni i finalizuar nga Specialistët për Hetimin e Krimeve në Komisariatin e Policisë Vlorë pasoi një denoncim për një vjedhje të ndodhur në mesditë në lagjen “28 Nëntori”.

Pas marrjes së njoftimit, shërbimet e policisë nisën menjëherë ndjekjen e autorit të dyshuar. Falë veprimeve operative, 20-vjeçari me iniciale V. M., banues në qytetin bregdetar, u lokalizua dhe u kap në flagrancë në zonën e “Ujit të Ftohtë”.

Gjatë ndërhyrjes, forcat e rendit arritën të rekuperonin mjetin e vjedhur, duke parandaluar humbjen përfundimtare të pronës së qytetarit.

Sekuestrimi i armëve të ftohta

Përveç mjetit motorik, gjatë kontrollit fizik të ushtruar ndaj të riut, efektivët gjetën një mjet të paligjshëm që shërben për sulm fizik.

U sekuestrua motomjeti i vjedhur dhe një përforcues metalik grushti (dorezë metalike).

Ndaj 20-vjeçarit rëndojnë dy vepra penale, vjedhja dhe prodhimi, mbajtja, blerja apo shitja pa leje e armëve të ftohta.

“Falë reagimit të menjëhershëm dhe veprimeve të shpejta hetimore, u bë e mundur identifikimi dhe kapja në kohë e autorit,” bëri me dije policia lokale përmes një komunikate për shtyp.

Materialet procedurale tashmë i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Vlorë.

/rtsh.al/