Një incident i rëndë dhe i paprecedentë është shënuar të mërkurën në ambientet e Senatit të Filipineve, ku raportohen të shtëna me armë zjarri mes kaosit dhe tensioneve të larta politike. Ngjarja ndodhi teksa autoritetet vendase zhvilluan një operacion për arrestimin e senatorit Ronald dela Rosa, i cili është shpallur në kërkim nga Gjykata Penale Ndërkombëtare (GJPN) nën akuzat për krime kundër njerëzimit.

Sipas dëshmitarëve dhe gazetarëve të pranishëm, shkaqet e sakta të të shtënave apo bilanci i mundshëm i të lënduarve brenda sallës mbeten ende të paqarta. Senatori dela Rosa mësohet se ka qëndruar brenda godinës, nën mbrojtjen e senatorëve aleatë të cilët kanë bllokuar përpjekjet e agjentëve të Byrosë Kombëtare të Hetimit për ta marrë atë në paraburgim.

Presidenti i Senatit, Alan Cayetano, u paraqit shkurtimisht përpara mediave duke konfirmuar të shtënat, bazuar në raportimet e sigurisë së godinës.

“Emocionet janë të larta këtu,” deklaroi Cayetano përpara se të largohej me nxitim. “Ky është Senati i Filipineve dhe dyshohet se jemi nën sulm.”

Situata detyroi një numër të madh gazetarësh dhe ekuipazhesh televizive të izoloheshin në katin e dytë të godinës, derisa mbërritja e Sekretarit të Brendshëm, Juanito Victor Remulla Jr., i shoqëruar nga forcat e policisë, bëri të mundur largimin e tyre të sigurt.

Akuzat e Hagës dhe fushata e përgjakshme e drogës

Tensionet e së mërkurës kulmojnë një javë të vështirë për dela Rosën, ndaj të cilit GJPN-ja publikoi të hënën një urdhër-arresti ndërkombëtar. Dokumenti e bën atë përgjegjës për vrasjen e “jo më pak se 32 personave” midis korrikut 2016 dhe prillit 2018.

Gjatë asaj periudhe, dela Rosa mbante postin e shefit të policisë kombëtare dhe ishte arkitekti kryesor në terren i fushatës brutale kundër drogës të urdhëruar nga Presidenti i atëhershëm, Rodrigo Duterte—një fushatë që la pas mijëra të vrarë, kryesisht të dyshuar të nivelit të ulët.

Senatori 64-vjeçar ka sfiduar hapur urdhrin e Gjykatës së Hagës, duke kërkuar mbrojtje nga mbështetësit dhe kolegët e tij brenda parlamentit. Në një reagim në rrjetet sociale, ai theksoi vendosmërinë e tij për të mos u ekstraduar.

„Nuk duhet të lejojmë që një tjetër filipinas të sillet në Hagë, i dyti pas Presidentit Duterte. Kjo është e papranueshme,“ u shpreh ai.

Duke mbrojtur veprimet e tij gjatë kohës që drejtonte policinë, dela Rosa mohoi përfshirjen në vrasje jashtëgjyqësore.

“Roli im ishte të udhëhiqja luftën kundër drogës dhe ajo luftë nuk kishte për qëllim shfarosjen e njerëzve,“ u tha ai gazetarëve.

“Kur ​​jeta e oficerëve të policisë vihej në rrezik, sigurisht që ata duhej të mbroheshin.“

Megjithatë, ai theksoi se është i gatshëm të përballet me drejtësinë, por vetëm “në gjykatat tona lokale dhe jo para të huajve.“

Përplasjet e forta politike në Manila

Ky zhvillim pritet të thellojë krizën politike në Filipine. Ish-Presidenti Rodrigo Duterte u arrestua në mars të vitit të kaluar dhe aktualisht ndodhet në paraburgimin e GJPN-së në Holandë, në pritje të gjyqit për krime të dyshuara kundër njerëzimit, dosje ku dela Rosa përmendet si bashkëautor.

Kampi politik i Dutertes, i udhëhequr nga vajza e tij dhe Zëvendëspresidentja aktuale Sara Duterte, ka drejtuar gishtin e akuzës drejt Presidentit aktual, Ferdinand Marcos Jr. Ata e akuzojnë kreun e shtetit se ka lejuar “rrëmbimin” e ish-presidentit nga një gjykatë e huaj, pavarësisht se Filipinet u tërhoqën zyrtarisht nga GJPN-ja në vitin 2019. Gjykata ndërkombëtare, megjithatë, ka argumentuar me sukses se ruan juridiksionin për krimet e kryera gjatë kohës kur vendi ishte ende anëtar i saj.

/rtsh.al/