Administrata amerikane dhe Irani duket se janë afër një marrëveshjeje për t’i dhënë fund konfliktit, me negociatat që po përqendrohen tek formulimi i disa pikave të mbetura.

Një zyrtar amerikan i informuar mbi bisedimet tha për “Axios” se palët janë pranë një marrëveshjeje, edhe pse ende nuk ka asgjë përfundimtare. 

Sipas këtij zyrtari, dallimet e mbetura kanë të bëjnë kryesisht me gjuhën e përdorur në dokumentin përfundimtar. Ka shenja në rritje se të dyja palët po konvergojnë drejt një zgjidhjeje, duke e vendosur procesin në rrugën e duhur. 

Më herët, Donald Trump deklaroi për të njëjtën media se “jemi 50-50, ose për një marrëveshje të mirë me Teheranin, ose për bombardimin e Iranit – dhe një bombardim që do ta asgjësojë atë”. 

Një burim pakistanez i përfshirë në bisedime i tha “Reuters” se marrëveshja e përkohshme midis dy palëve është në fazat e saj përfundimtare. Ai e përshkroi si një marrëveshje “mjaft gjithëpërfshirëse” që synon t’i japë fund luftës. 

Nga ana e tij, Teherani ka paraqitur një draft me 14 pika, i cili po diskutohet si bazë për marrëveshjen. 

/rtsh.al/