Policia e Tiranës, në bashkëpunim me Komisariatin e Policisë Krujë dhe Forcat Speciale RENEA, zhvilloi një operacion gjatë natës në fshatin Zallë të Fushë-Krujës për kapjen e 49-vjeçarit Ylli Zalla, i shpallur në kërkim dhe i konsideruar me rrezikshmëri të lartë.

Pavarësisht informacioneve operative për vendndodhjen e tij, Zalla arriti të largohej duke përfituar nga errësira dhe u fut në pyll. 

Gjatë kontrollit në banesën e tij, policia gjeti dhe sekuestroi një pistoletë me fishekë gati për qitje, një celular që dyshohet se i përkiste të shumëkërkuarit, municion luftarak dhe një detektor frekuencash.

Në banesë u arrestua edhe shtetasi F. A., 55 vjeç, i dyshuar për “Përkrahje të autorit të krimit” dhe “Moskallëzim të krimit”, pasi dyshohet se ndihmoi Zallën të largohej. 

Po ashtu, policia konstatoi edhe vëllain e tij, E. Z., 35 vjeç, i shpallur më herët në kërkim nga DVP Lezhë, i dyshuar si bashkëpunëtor në shpërthimin e një sasie lënde plasëse më 10 qershor 2026. Ai do të ndiqet në gjendje të lirë. 

Ylli Zalla është në kërkim që prej nëntorit 2025, kur në banesën e tij u zbulua arsenal armësh pas hetimeve për atentatin në Rinas, ku u vranë Gilmando Dani dhe Muçi Shaljani.

Më 20 shkurt 2026, policia zbuloi një tjetër arsenal armësh që dyshohet se i përkiste atij. Zalla ka një të kaluar kriminale të gjatë, përfshirë arrestimin 12 vite më parë për prodhim bombash artizanale, prodhim e shitje droge, si dhe dyshime për lidhje me grupin terrorist ISIS. 

Policia njoftoi se vijon puna intensive për kapjen e Ylli Zallës, ndërsa materialet procedurale i janë referuar Prokurorisë për veprime të mëtejshme. 

/rtsh.al/