Një 24-vjeçar është vënë në prangat e Policisë pasi dyshohet se plagosi me armë zjarri një 35-vjeçar në Pogradec.

Sipas Policisë, ngjarja ndodhi rreth orës 13:15, në lagjen nr. 3 të qytetit, ku gjatë një konflikti, shtetasi N. A., 24 vjeç, banues në Buçimas, dyshohet se qëlloi me armë zjarri në këmbë shtetasin B. S., rreth 35 vjeç.

I plagosuri u transportua në spital, ku po merr ndihmë mjekësore dhe ndodhet jashtë rrezikut për jetën.

Menjëherë pas ngjarjes, autori u largua nga vendi i ngjarjes, por shërbimet e Policisë së Pogradecit, në bashkëpunim me efektivët e Stacionit të Policisë Përrenjas, organizuan ndjekjen dhe bënë të mundur kapjen e tij në Përrenjas.

24-vjeçari është shoqëruar në komisariat, ku po kryhen veprimet procedurale.

Ndërkohë, grupi hetimor, nën drejtimin e Prokurorisë, vijon hetimet për zbardhjen e plotë të rrethanave të konfliktit dhe dokumentimin ligjor të ngjarjes.

/rtsh.al/