Pronari i një servisi automjetesh në zonën e Astirit është arrestuar nga policia, pasi dyshohet se ka mashtruar disa qytetarë duke marrë pagesa për riparime që nuk janë kryer.

Operacioni i koduar “Skema” u finalizua nga specialistët për Hetimin e Krimeve të Komisariatit të Policisë Nr. 6, pas kallëzimeve të disa pronarëve të automjeteve, të cilët deklaruan se kishin paguar shërbimet, por automjetet e tyre nuk ishin riparuar.

Në pranga u vu shtetasi M. H., 37 vjeç, pronar i subjektit të servisit, ndaj të cilit janë dokumentuar 6 raste të dyshuara të veprimtarisë kriminale të mashtrimit.

Sipas hetimeve, përveçse nuk ka kryer riparimet për të cilat ishte paguar, në disa raste 37-vjeçari dyshohet se ka tentuar edhe t’i shiste automjetet që i ishin lënë nga klientët për mirëmbajtje.

Gjatë operacionit, nga ambientet e servisit u sekuestruan 5 automjete, të cilat iu lanë në ruajtje pronarëve të tyre.

Policia bën me dije se vijon puna për dokumentimin e rasteve të tjera të mundshme të kësaj veprimtarie, ndërsa materialet procedurale iu referuan Prokurorisë së Tiranës për veprime të mëtejshme.

/rtsh.al/